23 Սեպտեմբերի 2019թ. 15:16

ԿՍՏԵՂԾՎԻ ԲՆԱՊԱՀՊԱՆԱԿԱՆ ԿՐԹՈՒԹՅԱՆ ԱԶԳԱՅԻՆ ԿԵՆՏՐՈՆ

Բնապահպանության նախարարությունում քննարկում է տեղի ունեցել Երևան քաղաքում բուսաբանական այգու հիմքի վրա կենսաբազմազանության պահպանման և բնապահպանական կրթության ազգային կենտրոնի ստեղծման թեմայով:

Քննարկմանը, որը վարել է բնապահպանության նախարար Արծվիկ Մինասյանը, մասնակցել են ՀՀ ԳԱԱ բուսաբանության ինստիտուտի գիտաշխատողները՝ տնօրեն Ժիրայր Վարդանյանի գլխավորությամբ, բնապահպանության նախարարի տեղակալ Խաչիկ Հակոբյանը, նախարարի իրավախորհրդատու Արեգ Ղարաբեգյանը, ՀՀ բնապահպանության նախարարության աշխատակազմի շրջակա միջավայրի պահպանության քաղաքականության վարչության պետ Գագիկ Մանուչարյանը:

Կառավարության ծրագրում բնապահպանական ոլորտին վերաբերող այլ հարցերի թվում նաև վերոհիշյալ կենտրոնի ստեղծման դրույթն է ներառված, որի իրականացման համար եռամյա ժամանակահատված է սահմանվել:

Քննարկման ընթացքում անդրադարձ է եղել կենտրոնի կարգավիճակի խնդրին, էկոկրթության և էկոտուրիզմի զարգացման հնարավորություններին: «Կենտրոնի ստեղծման հիմնական նպատակն այն է, որ մենք ունենանք ուժեղ, հզոր, ժամանակակից գիտական նորարարություններ ստեղծող կենտրոն, որը գիտականից զատ նաև պետք է ապահովի հանրության համար ճանաչողությունից սկսած մինչև հանգստի կազմակերպման գործառույթ:

Վստահ եմ, որ ծրագրի իրագործումից կշահեն թե´ ոլորտը, թե´ այն հաստատությունները, որոնք ընդգրկված կլինեն գործընթացում»,-իր խոսքում նշել է բնապահպանության նախարար Արծվիկ Մինասյանը՝ հավելելով, որ հարցը քննարկման թեմա կդառնա նաև բնապահպանության նախարարին կից գիտատեխնիկական խորհրդի առաջիկա նիստում:

Աղբյուրն` այստեղ